ديوان حلول البطالة

لقيتك واسفهلّ الخافق الضامي بعد لقياك=وتساوت كفـّتك ياصاحبي مع كفـّة اشواقي

لمحتك في مجاهيم السنين وقلت ياحيـّاك=فداك القلب كان القلب له وسط الصدر باقي

تمركا بالحشا هاك الدلال ومدّ لي يمناك=تقهوى عبرت ٍ مافارقتني داخل احداقي

من اوّل ماعرفتك والمشاعر ماتريد الاّك=تركت بجيـّتك بصمة غرام تزيـّن اوراقي

انا اللي ماعرف طعم المحبه والهوى لولاك=وانا اللي من سريتك بالمحبـّه شفت بـرّاقي

وانا اللي ماعرف طعم الشـهد لولا رحيق شفاك=وانا اللي ...آآآه تكفى لاتزود وتخرب اخلاقي

تحاشيت البعاد ولكن الله كاتب ٍ فرقاك=وانا مالي سوى حفظ الوداد وحفظ ميـثاقي

تـغافلني الزمان بساعتن سجـّيتها ويـّاك=وانا اللي ماحسبت ان الزمن بيصير سـرّاقي

حبيبي وان قضيت مع البعاد سنين كيف انساك=وانا اللي لو تركتك للبعاد القاك باعماقي

حبيبي وان طفت شمس الوصال اشعلت لك ذكراك=لك الله باصلك مادام في عمري بقى باقي

وفاي اللي تعلّمته حبيبي .. من عظيم وْفاك=طريقك ياوليفي بالمحبـّه .. تسـْـلكه ساقي

بـودّع صوتك اللّيلة على باقي أمل لقياك=عسى الله يجبر كسور الزمن وتعود لاعناقي

عبد الرحمن بن صليهم