ديوان حلول البطالة - قصيدة في وداع رمضان

زل ّ الشهر باقي له ايام ويروح=مرّ الشهر كنه مرور الرياحي

مسموح يا شهر الكرامات مسموح=يالله في باب المغفرة والنجاحي

هذا رمضان اللي به الباب مفتوح=في صدورنا يالله تزيد انشراحي

تصفد الشيطان وابليس مكبوح=ما عاد له فوق البسيطة انفتاحي

ابكي الشهر وانا بي الصوت مبحوح=عانيت من فرقاه زود الجراحي

من سنة الدنيا ترى ايامها تروح=مثل الخيول اللي تزيد الجماحي

خليت لك قلبي من اليوم مفتوح=لا رحت مني لا يكون الرواحي

عوّد وانا واحد من الناس منصوح=ان عدت انا جملة همومي تزاحي

يالشهر لك ذكر ٍ مع القوم ممدوح=اللي يحبون الذِكر والفلاحي

ما تنفع النجوى ولا ينفع البوح=قم سبح الله بالمسا والصباحي

تبنى السفينة بس بيد النبي نوح=والله غرق قومه وزاد الصياحي

اغرق مرت نوح ٍ وأغرق ولد نوح=ونجا هل التوحيد واهل الصلاحي

يالمودمي دنياك من غير مصلوح=من دون ذكر الله فلا هي رباحي

الهج بذكر الله والصوت مصدوح=قبل الغروب وقبل وقت الصباحي

احذر من الزلة ترى ارواحنا تروح=في دنيتك احذر تكون انفتاحي

احفظ لسانك لا يكن صوم مجروح=واحذر من صغار الكفر والبواحي

صوت الحمام اللي هديله على الدوح=يسبح الله مير صوته نياحي

هذا وانا صدري على الدين مشروح=اسألك يالواحد تزيد انشراحي

يالله بتوبة قبل ما تطلع الروح=ويالله بعفوك والرضا والسماحي

وتجعل لنا باب ٍ على الخير مفتوح=ودروبنا تنور بنور الصباحي

الشاعر : يحيى بن شيبان

https://www.youtube.com/watch?v=1NT9VgFB2wk

https://www7.0zz0.com/2024/04/08/02/259622636.png

قناة الشاعر على التيك توك
https://www.tiktok.com/@shiban84