حبل العلاقة

[الديوان]

الشاعر يحيى بن شيبان

الأمل في وصالك والشقا بالفراق=والمعنا تعنا ذاق مالا يطيق
ليت بين الولايف ما يصير الشقاق=لأن بيني وبينك فيه حبلن وثيق
فيه حبل العلاقة صار فيه اتساق=لكن اليوم كلن ماسكن له طريق
صار بيني وبينك فجوتن وإنشقاق=بِعد وادي حنيفه عن طريق العقيق
اصعب السم سمن في لساني يذاق=والمتاهه تبيّن لا مسكت الطريق
كان دربي ميسّر لين صار انغلاق=كل يومن ودربي شوف عيني يضيق
اتعب الرجل دايم خِص قبل السباق=لا انتهى الشوط الأول زاد فيني الشهيق
التنفس صعيبن صار فيه اختناق=قلت لا باس بمشي بإحتباس الحريق
ارهقتني ظروفي شفت ما لا يطاق=ودي اسلك طريقن في مقامي يليق
يا وجودي وجود اللي عِدم بالعراق=حزة الضيق يرجي فزعتن من رفيق
والله ان الفراسة تسبق الاستباق=في عيون النبيه اللي يشق الطريق
كن صوت الاصايل قبل وقت السباق=تنذر اللي حسبها مثل صوت النهيق
لك مكانن بقلبي لكن اليوم ضاق=وانت هملت نفسك لين جيت المضيق
كنت احذرك دايم لا تجي الانزلاق=غفلة القلب دايم صعب منها تفيق
والله ان البغيض من الحلال الطلاق=واعظم الذنب ذنبن عند بيتن عتيق
يوم مسرى محمد فوق ظهر البراق=الله اللي أمرها بإختصار الطريق
يوم رب الخلايق كاتب لنا فراق=ليه ترمي وليفك رمية المنجنيق
ادفن الود عجلن يوم غاب الوفاق=العلاقة بعضها بالمقابر تليق
كِسرة العود تبغى جمرتن واحتراق=ريحة العود تهدى كل حرن طليق
فيه ناس إتمنى كل يوم الفراق=ودهم اني بجدة وأنت صوب الحريق


https://www.youtube.com/watch?v=wOzPDscWfsc


قناة الشاعر على التيك توك
https://www.tiktok.com/@shiban84