طيب يام

[الديوان]

للشاعر : يحيى بن شيبان

أظن يام ٍ سحرهم صايب الناس=في كل موقف يكسب الطيب يامي

ماهو قصورن بالقبايل والاجناس=رِح وإنشد اللي بالمعاليق ظامي

أقولها والبال للطيب عسّاس=خاويت لي يامي به الطيب حامي

خاويت لي ذيبن كسب كل نوماس=سامي ولا بعده من القوم سامي

اللي إلى دقت مقابيس الاجراس=ياطى الخطر لو الصدر حيل دامي

عندي قوافي ما توّفى بقرطاس=لو إني أرقى بالقصيد الغمامي

إلى لحق بالي من الوقت عوماس=بين الخلايق جيت في ظل يامي

ياقف إلى صارو المخاليق جِلاس=طامي وأعرفه بين الأجواد طامي

يمشي حفا مشيٍ على روس الامواس=مشية جنودن صفهم بإنتظامي

يكظم على العدوان بأنياب واضراس=من سطوته صايب عداه إنقسامي

اللي شرب من غبنة الوقت له كاس=يلفي على يامي ولا غير يامي

قراحهم يذكر على كل فنطاس=اللي شرب منّه فلا هو بظامي

بالكيل وزنتهم على خير قسطاس=إخذ الجواب اللي عليه الكلامي

ناسن مجربها ومن خيرة الناس=دخيلهم ما ظن يومن يضامي

بيبانهم مفتوحتن دون ترباس=الضيف يلقى واجبه والسنامي

يا كاسبين الصيت من عند مكناس=إلين ديرتنا لكم صيت نامي

ياهل الكرم ياللي تكبون الاكياس=منتم من اللي عدها بإهتمامي

أقول يام وحطها بين الاقواس=لأني خبيرن بالشديد العصامي

يا عل تفدى روسكم روس الانجاس=اللي يجرون الردى والأثامي

اكتب قصيدة موثقة فوق قرطاس=اللي يذم يام ٍ تراه انفصامي

https://www.youtube.com/watch?v=gWSmZPvCijc


قناة الشاعر على التيك توك
https://www.tiktok.com/@shiban84