يارشيد لو تقرا على الناس يارشيد

[الديوان]

يارشيد لو تقرا على الناس يارشيد=ناس ٍ تضايقها تبارك وعمّ

ناس تريد الصيد واوقات هي صيد=ليته قبل لا يبدي الصيد سمّا

يا رشيد به ناس مثل قطعة الحيد=تقول هي صما ولا هيب صمّا

مجند ٍ نفسه على الكيد تجنيد=ويرمّ في عرض المخاليق رمّا

فيه الردى ياكل لحوم الاجاويد=اشوف ابو مرّه مع القوم ضمّا

اللي ربا ع الكيد ضاري على الكيد=كن الردا يسقا مع رضعة امه

تعبت ارد البيت واقول وازيد=نقالـــة القالــــة صنانيــــــــــع نمّا

لا يرمي الدعوى على زيد وعبيد=ذاك الخبيث اللي يجيب المطمّا

يا رشيد لو ثبت في رجله القيد=طميت فمه طمة ٍ فوق طمّا

لا واحسايف بعد ما راح ابو زيد=تصدّر المشهد هطيف ٍ و رِمّه

وين الزحول اللي رجال ٍ صناديد=امثال بن غانم مع اخوان شمّا

اثر الزمن لو خلد الناس تخليد=فيه ناس ما تذكر ولا هي مهمه

يوم الخطر نسمع كثير البواريد=والطار ما يرنع وهو ما تحمّا

يا رشيد دوك البيت يحتاج ترديد=من شاعر ٍ ينظم لك البيت نظما

الله يبي منا عبادة وتوحيد=بس للأسف بعض المخاليق صمّا

الشاعر : يحيى بن شيبان


https://www.youtube.com/watch?v=SMhNfXoeLlM


https://www2.0zz0.com/2025/05/20/21/703046590.jpg