ناس تدس الهم بين الحنايا

[الديوان]

ياظالمه زينـك بشيـن السوايـا=من وين لك قلب على طول جاير
مبغا الدوا لاصار جرحك دوايـا=باكر على الظالم تدور الدوايـر
اخر علاجي الكي وانتي الكوايا=للحب عبره وانتي قربك عبايـر
لو هو على زينك بنلقى صبايـا=المشكله في الحب تعمى البصاير
الصبح واضح والخطايا خطايـا=والربح من بعض الاوادم خساير
يانفس قومي عن غـرام البقايـا=وياقلب قبل الحب شاور وخايـر
اولاد ناس ولا نحـب الوصايـا=كلن يرى نفسه يعـادل عشايـر
ماكـل قلـبٍ ينشـرى بالهدايـا=ولا كل كسر تفيد فيـه الجبايـر
المعطـي الله مالخلقـه عطايـا=لو هي على خلقه سقتنا المراير
عزاي رب ٍ يعطي حسب النوايـا=يرحم عزيزين الزمن والضماير
ناس تدس الهم بين الحنايا=وناس وربي مادرت وش صاير
هذاك حظه مثل بيـض الثنايـا=وهذاك حظه مثل سود الضفايـر