لحظة وداع الغلا في زحمة الصالة

[الديوان]

لحظة وداع الغلا .. في زحمة الصاله=سلم علّيه .. وقال الله يعدلها
اقفى وفي خاطره هرجن .. ولا قاله=حتى (فمان الله ) ازرى لايكملها
يشر بيمناه .. مايدري عن الحاله=اللي غشتني .. وانا ازريت اتحملها
كن الشوى مع ضلوع الصدر ترقاله=وانا ابلع الريق ناشف .. لجل انزلها
ودموع عيني على الخدين منهاله=وامشها بالعمامه .. لا يلد الها
اخاف لو شافها.. تتغير احواله=والوم عيني واقول .. الله يفشلها
مابيه يزعل ولا يطري على باله=ولا راح اروح دموع العين واهملها
اقفى وانا اسبره واقف واتشفاله=تنداش الافكار من شيّن تخللها
واخذت في ماقفي ساعه وانا داله=عزي لقلبي من همومن يعاملها
من عقب ماراح عني ويش ابحيا له=سود الليالي عسى الله لايجملها
ان جيت ابى النوم والا ابغى اتهياله=عيني على النوم ماغير اتحايلها
ترسم على شاشه التفكير تمثاله=وتسهر على صورة الغالي تأملها
لحظه وداع الغلا .. في زحمة الصاله=انام واصحى من النوم اتخيلها