ديوان حلول البطالة - يا اميمتي ردي لنا الصوت ردي

يا اميمتي ردي لنا الصوت ردي=من يوم ما متي وانا اقول يمه

اقول يمه والصدى لي يردي=ما عاد بالدنيا ليالي مهمه

اقول يمه ذا الدهر مستبدي=الوقت مسقيني من العام سمه

صادفت بالدنيا كثير التحدي=واعزتي للي فقد ريحة امه

في خانتك كل النسا ما تسدي=من لامني يا عل بقعا تصمه

كم دمعة تنزل على نص خدي=تغرق المحزون واطراف كمه

تاخذني الذكرى على البيت اردي=اشوف لك ملفع قديم ٍ واشمه

شم الخلق عن شوفتك ما يسدي=لا راحت الشمه ولا جات شمه

الوقت لو ياخذ فلا هو يردي=لو حوت يونس طلع اللي بفمه

عدي لنا يا سود الايام عدي=فراقها كم عام ذا العام تمه

حزن الملا يضعف وانا مستشدي=يزيد في غمه على زود غمه

ما احد ٍ بلايمني الى باح سدي=نشوف بكره كيف لا ماتت امه

اقول هدي يا شقا الوقت هدي=جروحنا تحتاج ذا الوقت لمه

ما عاد بالايام ذي مستجدي=اللي مضى منها وفا بالمطمه

ايامها سود ٍ ثقالن تعدي=الاحزان دايم وافيه بالمهمه

يا رب ترحم والدي ثم جدي=وترحم امي كل ما قلت يمه

تمد لهم في جنة الخلد مدي=انت الذي عفوك علينا تتمه

ثم قال بن شيبان اتلا المردي=يالله تنجيني القبر فيه ضمه

انت الذي عديت للناس عدي=اكثر عباد الله من دون ذمه

اغفر لنا يوم الشدايد تشدي=يوم الرجل يفر عن شوفة امه

الشاعر : يحيى بن شيبان

https://www.youtube.com/watch?v=pEsp6GvOgwE

https://www2.0zz0.com/2025/05/15/11/214431393.jpg