ديوان حلول البطالة - يا سعود لو تدري عن اجواء تموز

يا سعود لو تدري عن اجواء تموز=قم واسمع النشرة على كل تلفاز

قال المذيع اخبار في ضمنها نيوز=الحرّ من لندن الى دون الاحواز

حتى العمود اللي على القاع مركوز=ما عاد له ظل ٍ يفضل ويمتاز

حلالنا روّح من الصوف مجزوز=يتعب به الشاوي الى صار جزاز

كم طير في رجوى تناقيط بزبوز=عزاه يا ام سالم وعزاه يالباز

الرِّق ما ينفع مع لبسة الشوز=توقف الانتاج في معمل الغاز

لا عاد به نفتا ولا غاز مفروز=القيظ ما ساعد على جو الافراز

البلنت به شداون ثم بانت رموز=رموزها صعب التقارير تجتاز

يا موتري لو يلحق الجمر القزوز=يصعب عليّ اللمس من دون قفاز

يا ليت من شرّف على صيهد اللوز=شمال غربك يالوطن فوق الحجاز

الجمس لي شف ٍ ولا احتاج لي روز=الجمس في قطع المسافات يمتاز

ماني هل ام كلثوم ولا صوت فيروز=لي مسمع ٍ يكره ترانيم الانشاز

عطنا من الشعبي مواويله تجوز=ما فاز به غير القديمين ما فاز

عطني خلف هذال ما ريد فيروز=الابيات في شعره كما صيغة الغاز

يا جامعين المال والمال مكنوز=نفسك لها حق ٍ ترى النفس تعتاز

تعتاز لك حجز ٍ مؤكد ومحجوز=واختار لك قرم ٍ عن الناس يمتاز

يمتاز عن كثر المخاليق ويفوز=هذا هو الانجاز الى قيل الانجاز

وقف ولو عودك على القاع مهزوز=لو تمشي الخطوات من فوق عكاز

الشاعر : يحيى بن شيبان

https://www.youtube.com/watch?v=giqkla_rAh8

https://www2.0zz0.com/2025/08/29/17/417135157.jpg