ديوان حلول البطالة - قصيدة بر الوالدين

ياليت لو عندي حدا والديني=ودي اقدم بـِر مخصوص للعود

ياللاسف وينه وانا اليوم ويني=يالله عساه بجنة الله يا سعود

لامن ذكرته هلت دموع عيني=اجاهد العبرات والعالم رقود

تثاقل الخطوات بي والسنيني=الوضح فيها كنها حالكة سود

ان قلت واويلاه يا شيب عيني=عديت بالدنيا على غير مردود

يالله تعلم ما مضى من سنيني=كنت ابذل المجهود بالبر و ازود

ابوي حطيته وسط نون عيني=وللوالدة بـِر موّثق ومشهود

ياليت لو ترجع عقود السنيني=ياليتني توّي مع الناس مولود

يا زين وقت ٍ راح متشاهديني=واميمتي عندي وانا مشاهد العود

لا والله الا روّحت بي سنيني=راحت خطاويها مثل خطوة الذود

يتعبني الماضي و جرّ الونيني=اطوّح الونات من غير مجهود

لابوك يالجوال وين الرنيني=ليت اتصال امي غدا غير محدود

الله يكتب لي أجر خطوتيني=خطيتها لأمي وانا كنت مجهود

بريتها بِـر الغلام الأميني=ارجي رضاها وين مارحت يا سعود

بريتها شفت العوض في بنيني=وليد وعبدالله عسى عمره يزود

عيسى وشيبان الامل واليقيني=براعم ٍ تمشي على منبع الجود

ابيات نكتبها بزود الحنيني=بيت ٍ على بيت ٍ على قاف مسرود

ياليت في يدي عدال السنيني=تشوفها تمشي على سهود ومهود

استغفر المعبود من كلمتيني=يغفر بها ذنبي كريم ٍ ومعبود

لا عاد باليسرى ولا باليميني=انا ضعيف ودايم الجهد محدود

اطلب من المولى عساها تزيني=الله ولا غيره ملك كامل الجود

الشاعر : يحيى بن شيبان

https://www.youtube.com/watch?v=1sNelisciG0

https://www2.0zz0.com/2025/10/20/11/900190743.png
https://www2.0zz0.com/2025/10/17/23/289315291.png