ديوان حلول البطالة - ليتك تحس بشعوري

يا صاحبي ليتك تحس بشعوري=الوقت يمضي بي ولا فيه راحه
لمحت لك تلميح بين السطوري=اقول يمكن انك تحب الصراحه
انا معك لكن ضعيف ٍ حضوري=ما كن لي فوق الاراضي مساحه
لو تنشد الواتساب آخر ظهوري=تلقاه يوم السبت بأول صباحه
انا اكتم العبرات في وسط زوري=عزاه يا قلب ٍ تزايد جراحه
تمور بي دنياي حيل ٍ تموري=مور الغشيم اللي جهل بالسباحه
تمضي بي الايام كنها شهوري=البارحة ليلي تباطى صباحه
ليت الدقايق والثواني تدوري=دور الهبوب اللي سريع ٍ رياحه
حاولت ابني لك كثير الجسوري=ابغى معك راحة ولا شفت راحه
وش بك تجاهلني بزود الغروري=تقول ماخذ من ضميرك مساحه
من اول ٍ تاخذ من الشور شوري=واليوم نفسي كنها مستباحه
اول اماري بك وانا بك فخوري=واليوم لا والله خذها صراحه
لا تحسب اني مبتدي بالقصوري=بديتها وانت تحسب انها مباحه
انا احسبك قبطان وسط البحوري=واثريك تجهل في رموز الملاحه
جرحتني جرح ٍ يخلً بشعوري=ما فادني حتى طبيب الجراحه
سجنت قلب ٍ مخلص ٍ لك طهوري=متى على الله يوم تطلق سراحه

الشاعر : يحيى بن شيبان

https://www.youtube.com/watch?v=3vF7S2z8a8E

https://up6.cc/2026/01/176981651012311.jpg