ديوان حلول البطالة - ياسعود لو شفت تبليسي

ياسعود لو شفت تبليسي=هي غاية النفس مطلوبه

لا شك فيها الاباليسي=فيها التماثيل مصلوبه

فيها تزيل الهواجيسي=لو دنيتك فيك مقلوبه

ياحلو ذيك التضاريسي=ودك لك الضو مشبوبه

باتومي جو المعاريسي=من بعد ماهيب مخطوبه

ماعاد فيها وساويسي=سج القدم مِدّ في اللوبه

آخذ من الهرج وآقيسي=وادري المقادير مكتوبه

ما عشت جو الكوابيسي=ولا جيت في الهم وكروبه

نسيت كل القواميسي=كن ساحة الراس معطوبه

حل المسا بالنسانيسي=شمسي عن العين محجوبه

لو نحرق المال والكيسي=ابغى السعد يوم ودروبه

لو شفت مجمول ومخيسي=لإثنينهم قلت والكوبه

الوجه وجه المفاليسي=وانا فلا نيب من ثوبه

ماكن عليهم ملابيسي=كل واحدٍ قاد محبوبه

قاده لدرب المدانيسي=والدرب مافيه من توبه

ناس ٍ حكمتها الاباليسي=ما تفتكر يوم في الحوبه

تطفى عليه الفوانيسي=كيابل البيت معطوبه

تهيّت العنز للتيسي=يوم القحت جات من صوبه

الجيل يحتاج تأسيسي=فيه الخلل طال في دروبه

انا احسب خطاي بالديسي=ودي لي العين معصوبه

حلفت لو جيت تبليسي=لأمشي وانا خطاي محسوبه

شعر ٍ كِتب بالقراطيسي=كل شاعر ٍ خط ّ بأسلوبه

يا سعود دق النواقيسي=كود الفتى يخف بذنوبه

يحيى بن شيبان

https://www.youtube.com/watch?v=JBr6KfvmoV4