راكب اللي ما تسوقه ام الكعب

[الديوان]

 

راكب اللي ما تسوقه ام الكعب=عيال هتلر صانعينه للشباب

لو نسوقه سوق من عند النقب=سالك ٍ بالدرب ما رده ضباب

العجايب في مسيره والعجب=لو يسوقه عود حسّ انه شباب

يجذب اللي بالمواتر ما انجذب=ثم يسبح في بحور الانجذاب

ما يجيك النوم تدري ش السبب=فيه شي ٍ ما حسبنا له حساب

لا عطاك الكوب والصدر الرحب=فيه كافي قلت يا نعم الشراب

موجة الاصوات لا حان الطرب=فيه سستم يطرب السايق طراب

وان بغيته للصخب فيه الصخب=راق فيه الحال يوم الراس طاب

دق سلفه كنه انذار الغضب=و آخر الشكمان فيه من الشهاب

ذا فصيح ٍ بالتخاطب والخطب=ما هو غيره كن صايبه اضطراب

احذر من اليخت لا منه قرب=من وحيفه طار بالجو التراب

كن جنوطه الا مضاعد من ذهب=والتواير صمموها للصعاب

ان ركبت السيت كنك في كنب=فيه راحة ما تشوف الاكتئاب

ان مشى بالخط ما همه مطب=كنه الا حر من فوق السحاب

مركب الحكام واصحاب والرتب=ومركب ٍ للذوق وسمحين الجناب

ذا صنع برلين فيه من العجب=ما صنع من مصنع ٍ فيه ارتياب

العيوب المصنعية تنسحب=يكسب الاصوات حين الانتخاب

خذ كلامي والجواب المقتضب=لا شريته فأعلم انك في صواب

في المعارض زايدن فيه الطلب=مطلب ٍ للعود ورغبة للشباب

ما ذا موتر ذا سبايك من ذهب=حط فيه المال يا مال الذهاب

لا دنا عند الجمارك واقترب=في النويصيب اكتمل فيه النصاب

يلفت الانظار شوفة عن كثب=خِص لونه لا كسب لون السحاب

وقفته وقفة حشيم ٍ بالادب=وان مشى بالخط يفصل بالخطاب

المواتر كل ابوها تنشطب=اكتسحهم بالذهاب وبالاياب

بالمواتر هذا راس ٍ مو ذنب=خذ جواب ٍ ما ورى بعده جواب

يمدحونه بالصحافة والكتب=والنقابة دوم تحسب له حساب

فيه هيبة كنه السيف الحدب=لا دنا بالساحة من فوق الرقاب

يشجبه من هو تمرس بالشجب=ولا عليه اليخت من كثر العتاب

وينكم يا اهل الثقافة والكتب=وينكم يا اهل القواعد والحساب

فيه مسائل حلها عندي صعب=تنتظر كشف الحقيقة والنقاب

كان عشق اليخت فيه من العتب=اعذروني ما على الدنيا عتاب

خاسر ٍ من جاب للسوق وجلب=من يبيع اليخت غادي في سراب

واعذرينا بالحكي يا ام الكعب=نسأل الله المعونة والثواب


الشاعر : يحيى بن شيبان