معاداة الاقراب

[الديوان]

 

البارحة نومي عن العين غايب=ان قلت هي بأسباب ولا بلا اسباب

لي خافق ٍ عيا يشيل المصايب=ادناة ما حسه من الناس يرتاب

يا وقتي التالي كثير العجايب=ناس ٍ تعادينا بلا ذنب وأسباب

بعض القرايب ياعساه النشايب=اللي لهم وجه ٍ مثل وجه الاجناب

اللي هروجه كل ابوها كذايب=ما ينطق الحكمة له لسان شباب

شباب نار ٍ يا عساه الذهايب=في دنيته يالله عساه التغراب

ياليت له هرج ٍ مع الناس رايب=مير البلا معروف بالحيل كذاب

يغيب له يومين ثم جاك جايب=ما جاب لك خير ٍ الا قِيل وش جاب

لا صار ابن الاجواد بالحيل خايب=قال المثل هذا بلا ابوك يا عقاب

فيه حكمة ٍ عنها الكثيرين غايب=في مقتل ابن آدم بعث ربي غراب

غراب بيّن له عظيم المصايب=اللي بدا ذنبه مع اخيه وش جاب

ما جاب غير الا الدموع السكايب=حيثه عجز لا يدفن اخيه بتراب

نعلم من الطيب ومن كان خايب=اقول يا سِعد المخاليق الالباب

يالمودمي آخر عمرك النصايب=في حفرة ٍ معروفة ٍ مالها باب

تفقد عيالك والأهل والحبايب=ما عاد به عرف ٍ ومعروف وانساب

ان كان ما تدري عليك الرقايب=عِرض ٍ تعرضله له اليوم طلاب

اخذ الحذر لا تاكل بكل غايب=ياويل من في عرض الاجواد يغتاب

الله خلقنا بين صلب وترايب=الآدمي مخلوق من حفنة تراب

اسباب هذا مني القلب ذايب=الدمع مرزام ٍ على الخد صباب

صباب دمعي كالمزون السحايب=لا تلوم لي دمعي على القاع سكاب

دنياك هذي كل ابوها غرايب=لا بدلت دنياك الاقراب بأجناب

الاجناب فيهم وقفةٍ بالنوايب=الاقراب فيهم الرجا والامل خاب

يوم ان ولد اللاش بالحيل هايب=الذيب له صولات والذيب ما هاب

وين الذي تلقاه وقت النوايب=في نصرة المضيوم ما يحسب حساب

صديت عن هرج القفا والنشايب=ما عاد لي خلق ٍعلى هرج وعتاب

يالله لا ترحم من الناس خايب=عساه بالدنيا كسير ٍ ومنصاب

وختامها صلو عداد الهبايب=على الشفيع اللي لنا يوم الحساب


الشاعر : يحيى بن شيبان